Oprop Tresoar Fellow 2027

Tresoar en de Freonen fan Tresoar stimulearje in nije generaasje ûndersikers fan de Fryske skiednis, literatuer en/of kultuer. Mei inoar hawwe sy it Tresoar Fellowship ynsteld. Elk jier wurdt in stipendium beskikber steld oan in jonge akademikus út binnen- of bûtenlân. Dêr kin in ynnovatyf ûndersyksprojekt fan likernôch trije moannen mei stipe wurde. Kandidaten fan alle dissiplines en nasjonaliteiten binne wolkom. Alle ynteressearren foar de 2027-ronde kinne oant 6 novimber 2026 in útstel yntsjinje.

Betingsten

• De Tresoar Fellow is in ôfstudearre akademikus dy’t heart by in nije generaasje ûndersikers (dat wol sizze ôfstudearre nei 1 jannewaris 2016).
• Fan de fellow wurdt ferwachte dat dyjinge fernijend ûndersyk docht nei in (diel)ûnderwerp út ien fan de haadtema’s fan Tresoar (sjoch hjirûnder) en dêrby aktyf gebrûk makket fan de kolleksje fan Tresoar.
• De fellow jout in publykslêzing yn Tresoar.
• De fellow skriuwt in artikel oer de resultaten fan it ûndersyk en biedt dat oan by yn ien fan de Fryske wittenskiplike tydskriften, lykas Us Wurk of De Vrije Fries.
• By dizze en oare publikaasjes dy’t fuortkomme út it fellowship wurdt fermelding fan it Tresoar Fellowship ferwachte.
• It fellowship set yn kalinderjier 2027 útein, uterlik foar 1 juny 2027.

Haadtema’s

Tresoar ûntwikkelet syn kolleksje fan in oantal haadtema’s út:

• Fryske skiednis
• Fryske literatuer
• Fryske kultuer

It ûnderwerp fan de fellow slút by ien fan de boppesteande tema’s oan. Tresoar en de Freonen fan Tresoar kinne in foarkar foar ien fan de tema’s útsprekke.

Stipendium

Tresoar en de Freonen fan Tresoar stelle yn ’e mande in bedrach fan € 12.000 bruto beskikber as honorarium foar de útkeazen fellow. Dêrnjonken kinne reis- en ferbliuwskosten yn rekken brocht wurde oant in maksimum fan € 1.500. It stipendium kin takend wurde as in zzp-fergoeding oan de fellow sels (derfan útgeand dat dy as zzp-er oantsjutten wurde kin) of as in fergoeding foar it detasjearjen oan de wurkjouwer fan de fellow (as dy ree is om dêr oan mei te wurkjen).

Kritearia

Kandidaten foar it fellowship wurdt frege in eigen útstel yn te tsjinjen, dêr’t de relâvansje foar ien fan de neamde haadtema’s dúdlik yn ûnderboud wêze moat. In ûnôfhinklike sjuery gearstald troch de beide finansiers sil út de ynstjoerde útstellen in kar meitsje. De sjuery let dêrby op:

• kwaliteit fan de ûndersiker; dat moat bliken dwaan út in cv en in publikaasjelist;
• de helberens fan it projekt;
• it ynnovative en kreative karakter;
• oft it ûnderwerp oansprekkend is foar in breder publyk;
• wittenskiplike relâvansje fan it útstel;
• maatskiplike relâvansje fan it útstel.

Fasiliteiten

• Tresoar stelt ûnder de normale kantoaroeren in fleksplak ta beskikking as dat winsklik is en biedt ûndersyksfasiliteiten yn argiven.
• Fan Tresoar út wurdt in begelieder/kontaktpersoan oanwiisd.

It útstel

Utstellen meie yn it Frysk, Nederlânsk of Ingelsk opsteld wurde en moatte foar freed 6 novimber 2026 per mail stjoerd wurde nei ynfo@tresoar.nl.

It útstel befettet:

• in curriculum vitae fan de oanfreger;
• in wittenskiplik ûnderboud útstel mei in omfang fan tusken 1.000 en 1.500 wurden;
• in list fan relevante publikaasjes fan de oanfreger;
• in begjin- en eindatum foar it útstelde ûndersyk en in tiidpaad;
• kontaktgegevens fan ien út de akademyske wrâld dêr’t de sjuery in referinsje by opfreegje kin.